پیٹرول کی قیمت 9 روپے 66 پیسے کمی کے بعد84 روپے 53 پیسے فی لیٹر ہوگئی

اسلام آباد: اوگرا نے پیٹرولیم مصنوعات کی قیمتوں میں کمی کا نوٹی فکیشن جاری کردیا جس کے مطابق پیٹرول کی فی لیٹر قیمت 9 روپے 66 پیسے کمی کے بعد 84 روپے 53 پیسے ہوگئی ہے۔

اوگرا نے وزیراعظم کی ہدایت پر پیٹرولیم مصنوعات کی قیمتوں میں کمی کردی ہے جس کے بعد ہائی آکٹین کی قیمت 10 روپے 18 پیسے کمی کے بعد 106  روپے 27 پیسے، ہائی اسپیڈ ڈیزل 7 روپے 12 پیسے کمی کےبعد 94 روپے 9 پیسے اور لائٹ اسپیڈ ڈیزل 5 روپے 39 پیسے کمی کے بعد 77 روپے 98 پیسے پر آگیا ہے جبکہ مٹی کا تیل 4 روپے 34 پیسے سستا ہوگیا ہے۔

حکومت نے عالمی منڈی میں تیل کی گرتی ہوئی قیمتوں کے پیش نظر گزشتہ ماہ بھی پیٹرولیم مصنوعات کی قیمتوں میں 14 روپے فی لیٹر سے زائد کی کمی کی تھی جبکہ قیمتوں میں حالیہ کمی کے بعد پیٹرولیم مصنوعات کی قیمتیں 2008 کی سطح پر آگئی ہیں۔

واضح رہے کہ وزیراعظم نوازشریف نے حویلیاں میں جلسہ عام سے خطاب کے دوران پیٹرولیم مصنوعات کی قیمتوں میں کمی کا اعلان کیا تھا جبکہ اس موقع پر ان کا کہنا تھا کہ پیٹرولیم مصنوعات کی قیمتوں میں کمی سے ٹرانسپورٹ کے کرایوں میں کمی ہوگی جس سے نہ صرف عوام کو ریلیف ملے گا بلکہ مہنگائی کو بھی قابو میں کیا جاسکے گا اور امید ہے کہ دھرنے والے پیٹرولیم مصنوعات کی قیمتوں میں کمی پر اعتراض نہیں کریں گے۔